Skólareglur Melaskóla

Nemendur bera ábyrgð á eigin námi, framkomu sinni, háttsemi og samskiptum við skólasystkin og starfsfólk skóla, þ.m.t. rafrænum samskiptum og netnotkun með hliðsjón af aldri og þroska þeirra.

1. Nemendum ber að mæta stundvíslega í allar kennslustundir.
2. Nemendur temji sér góða umgengni og gangi rólega um ganga skólans.
3. Nemendur hlýði starfsfólki skólans og sýni því og samnemendum fyllstu kurteisi. Þeim ber að koma fram af prúðmennsku og sýna tillitssemi.
4. Í frímínútum mega nemendur ekki fara út af leikvelli skólans. Hjólreiðar á leikvelli eru bannaðar svo og leikir eða leiktæki sem geta skaðað aðra.
5. Nemendum leyfist ekki að nota snjalltæki eða spilara í skólanum nema með leyfi.
6. Nemendur komi með hollt nesti í skólann, ekki sætindi, gosdrykki og tyggigúmmí.
7. Verðmæti svo sem peningar, farsímar og hjól eru á ábyrgð nemenda og forráðamanna.
8. Nemendum er heimilt að hafa farsíma með sér í skólann. Þó skal vera slökkt á símanum og hann geymdur í tösku nemenda frá því að komið er í skólann í upphafi skóladags og þar til skóladegi lýkur. Farsímanotkun nemenda er því bönnuð í skólanum og á skólalóð meðan á skólatíma stendur.

Foreldrar bera ábyrgð á uppeldi barna sinna. Þannig bera foreldrar einnig ásamt börnum sínum ábyrgð á hegðun þeirra og framkomu gagnvart samnemendum og starfsfólki skóla og eiga að bregðast við afleiðingum hegðunar barna sinna í skóla.